काठमाडौँ । नेकपा एमालेका सचिव एवं पूर्वमन्त्री महेश बस्नेतलाई पक्राउ गर्न माग गर्दै उजुरीकर्ता शोभा पाठक जिल्ला प्रहरी परिसर काठमाडौं पुगेकी छन् । बस्नेतमाथि बलात्कार र भ्रूण हत्याको आरोप लगाउँदै यसअघि नै उजुरी दिएकी पाठकले आज (आइतबार) उनलाई तत्काल नियन्त्रणमा लिन माग गर्दै निवेदन दिएकी हुन् ।
पाठकले आज बिहानै जिल्ला प्रहरी परिसर काठमाडौं र सरकारी वकिलको कार्यालयमा पुगेर बस्नेतविरुद्धको अनुसन्धान प्रक्रिया अगाडि बढाउन र उनलाई पक्राउ गर्न दबाब दिएकी छन् ।
घटनाको पृष्ठभूमि
शोभा पाठकले केही समयअघि सचिव बस्नेतविरुद्ध बलात्कार, भ्रूण हत्या र डकैतीको आरोप लगाउँदै किटानी जाहेरी दिएकी थिइन् । सोही प्रकरणमा प्रहरीले अनुसन्धान गरिरहेको भए पनि बस्नेत पक्राउ परेका थिएनन् । आज बिहान एमाले अध्यक्ष केपी शर्मा ओली र पूर्वगृहमन्त्री रमेश लेखक पक्राउ परेलगत्तै पाठक पुनः कानुनी प्रक्रियाका लागि सक्रिय भएकी हुन् ।
बस्नेतको प्रतिक्रिया र वर्तमान अवस्था
यता, महेश बस्नेतले भने आफूविरुद्धका आरोपहरू राजनीतिक प्रतिशोधका आधारमा लगाइएको दाबी गर्दै आएका छन् । आज बिहानै उनले अध्यक्ष ओलीको पक्राउविरुद्ध देशव्यापी आन्दोलनको घोषणा गरेका थिए ।
प्रहरीले पाठकको निवेदन बुझे पनि बस्नेतलाई पक्राउ गर्ने सम्बन्धमा ठोस निर्णय भइसकेको छैन । भक्तपुरस्थित बस्नेतको निवास गुण्डु वरपरको सुरक्षा व्यवस्था भने कडा पारिएको छ ।
