सिन्धुपाल्चोक-२ मा नेकपाका युवराज दुलाल विजयी, पूर्वमन्त्री शेरबहादुर तामाङ तेस्रो

चौतारा (सिन्धुपाल्चोक) । सिन्धुपाल्चोक निर्वाचन क्षेत्र नम्बर २ बाट प्रतिनिधिसभा सदस्यमा नेपाली कम्युनिस्ट पार्टी (नेकपा) का उम्मेदवार युवराज दुलाल निर्वाचित भएका छन् । दुलालले नेपाली कांग्रेसका उम्मेदवार बंशलाल तामाङलाई २ हजार ५५३ मतको अन्तरले पराजित गर्दै जित हासिल गरेका हुन् ।

अन्तिम मतपरिणाम अनुसार दुलालले २१ हजार ६९९ मत प्राप्त गरे भने उनका निकटतम प्रतिस्पर्धी कांग्रेसका तामाङले १९ हजार १४६ मत पाए ।

प्रमुख उम्मेदवारहरूको अन्तिम मत विवरण:

प्रदेशबाट संघको यात्रा: को हुन् युवराज दुलाल ?

२०३९ साल फागुन ७ गते चौतारा साँगाचोकगढी–७ मा जन्मिएका दुलाल जिल्लामा ‘जनमुखी र सक्रिय’ युवा नेताका रूपमा परिचित छन् । स्नातकोत्तर तहसम्मको अध्ययन पूरा गरेका उनले यसअघि सोही क्षेत्रको प्रदेशसभा (क) बाट दुई पटक निर्वाचन जितिसकेका छन् ।

बागमती प्रदेश सरकारमा सामाजिक विकास र पूर्वाधार विकास जस्ता महत्वपूर्ण मन्त्रालय सम्हालेका दुलालले आफ्नो कार्यशैली र विकासप्रेमी छविका कारण तुलनात्मक रूपमा कमजोर सङ्गठनात्मक अवस्थाका बावजुद पनि जित निकाल्न सफल भएका हुन् ।

बदलिएको चुनावी समीकरण

यसअघि २०७९ को निर्वाचनमा यस क्षेत्रबाट नेपाली कांग्रेसका मोहनबहादुर बस्नेत भारी मतान्तर (३९,३८१ मत) सहित विजयी भएका थिए । त्यतिबेला नेकपा माओवादी केन्द्रको साथ पाएका बस्नेतले एमालेका शेरबहादुर तामाङलाई पराजित गरेका थिए ।

तर, यसपटकको निर्वाचनमा एमालेका प्रभावशाली नेता शेरबहादुर तामाङ १५ हजार ९२६ मतका साथ तेस्रो स्थानमा खुम्चिएका छन् भने रास्वपाका झलक कुमार श्रेष्ठले १४ हजार मत कटाएर उल्लेख्य उपस्थिति जनाएका छन् । इन्द्रावती गाउँपालिकाका पूर्वअध्यक्ष समेत रहेका कांग्रेसका बंशलाल तामाङसँगको कडा प्रतिस्पर्धालाई चिर्दै दुलालले संघीय संसद्को यात्रा पक्का गरेका हुन् ।