काठमाडौँ । नेपालले अन्तर्राष्ट्रिय क्षेत्रमा ठूलो प्राविधिक र व्यावसायिक सफलता हासिल गरेको छ । भारतको इन्दौरस्थित होटल शेराटनमा आयोजित दुई छुट्टाछुट्टै प्रतिष्ठित विश्वस्तरीय प्रतियोगितामा नेपाली टोली र पेशाकर्मीले प्रथम स्थान हासिल गर्दै ऐतिहासिक सफलता प्राप्त गरेका हुन् ।
EMTECH २०२६ मा ‘टिम गुर्खाज’ विश्वविजेता
प्राविधिक नवप्रवर्तन (Technical Innovation) का लागि प्रख्यात प्रतियोगिता ‘EMTECH २०२६’ मा नेपालको ‘टिम गुर्खाज’ विश्वविजेता बनेको छ । १२ देशका १२० वटा टोलीलाई पछि पार्दै नेपाली टोलीले पहिलो स्थान सुरक्षित गरेको हो ।
विजेता टोलीमा सुजित कुमार दास, निरज कुमार मण्डल, बिक्रम सापकोटा र दामोदर भट्ट रहेका छन् । उनीहरूले आफ्नो प्राविधिक दक्षता र नवीन सोचका आधारमा यो उपलब्धि हात पारेका हुन् ।
सेल्स प्रतियोगिता ‘प्रोफर्मर्स’ मा शैलेन्द्र चन्द उत्कृष्ट
यसैगरी, VECV अन्तर्राष्ट्रिय सेल्स प्रतियोगिता (PROFORMERS सिजन ११) मा पनि नेपालले सफलता कायम गरेको छ । २२ देशका ३५० भन्दा बढी प्रतिस्पर्धीहरू सहभागी रहेको उक्त प्रतियोगिताको ‘बस विधा’ तर्फ नेपालका शैलेन्द्र चन्द विजयी भएका छन् ।
नेपाली जनशक्तिको बढ्दो साख
यी दुई सफलताले नेपाली प्राविधिक जनशक्तिको क्षमता र सेवा प्रवाहको स्तर अन्तर्राष्ट्रिय मापदण्ड अनुसार रहेको पुष्टि गरेको छ। व्यक्तिगत उत्कृष्टता मात्र नभई, यसले विश्व बजारमा नेपालको इन्जिनियरिङ र व्यावसायिक कौशललाई बलियोसँग स्थापित गरिदिएको छ ।
यो ऐतिहासिक उपलब्धिले प्राविधिक र व्यावसायिक क्षेत्रमा लागेका अन्य नेपाली युवाहरूलाई पनि विश्व मञ्चमा प्रतिस्पर्धा गर्न नयाँ ऊर्जा र प्रेरणा प्रदान गर्ने विश्वास लिइएको छ ।
