काठमाडौँ । नेपाल विद्युत् प्राधिकरणले विद्युत् महसुल सङ्कलन प्रक्रियालाई थप प्रविधिमैत्री र सहज बनाउन नयाँ सेवा प्रदायकहरू खोज्न थालेको छ । प्राधिकरणले डिजिटल माध्यमबाट महसुल उठाउन इच्छुक र सक्षम संस्थाहरूबाट औपचारिक प्रस्ताव आह्वान गरेको हो ।
प्राधिकरणको यस पहलले दुर्गम क्षेत्रका ग्राहकलाई समेत घरदैलोमै भुक्तानीको सुविधा पुर्याउने लक्ष्य राखेको छ ।
सेवा प्रदायकका लागि आवश्यक सर्तहरू:
इजाजतपत्र: नेपाल राष्ट्र बैंकबाट भुक्तानी सेवा प्रदायकको इजाजत प्राप्त गरेको हुनुपर्ने।
कानुनी कागजात: दर्ता तथा नवीकरण प्रमाणपत्र, कर चुक्ता, प्रबन्धपत्र र नियमावली अनिवार्य।
सुरक्षा: डाटाको गोपनीयता र सङ्कलित रकम सुरक्षित रूपमा प्राधिकरणको खातामा जम्मा गर्ने सुनिश्चितता।
बैंक जमानत: छनोट भएका संस्थाले कम्तीमा एक वर्षका लागि १ करोड रुपैयाँ बराबरको बैंक जमानत (Bank Guarantee) पेस गर्नुपर्ने ।
ग्राहकले तिर्नुपर्ने सेवा शुल्क:
प्राधिकरणले ग्राहकलाई अतिरिक्त आर्थिक भार नपरोस् भनी सेवा शुल्कको सीमा समेत निर्धारण गरेको छ:-
| भुक्तानी रकम (रु.) | अधिकतम सेवा शुल्क |
| ५०० सम्म | निःशुल्क |
| ५०१ देखि ५,००० सम्म | ५ रुपैयाँ |
| ५,००१ देखि १०,००० सम्म | ८ रुपैयाँ |
| १०,००० भन्दा माथि | १० रुपैयाँ |
अन्य व्यवस्था:
प्राधिकरणले सेवा प्रदायकलाई छुट्टै अतिरिक्त शुल्क उपलब्ध गराउने छैन । प्रदायकले तोकिएको शुल्कबाटै आफ्नो व्यवस्थापन गर्नुपर्नेछ । प्रस्ताव स्वीकृत भएको १५ दिनभित्र सम्झौता प्रक्रिया पूरा गर्नुपर्ने प्रावधान राखिएको छ । कुनै विवाद उत्पन्न भएमा प्राधिकरणद्वारा गठित विशेष समितिले समाधान गर्नेछ ।
