पाँच महिनामा वाणिज्य बैंकको नाफा १५.९२% ले घट्यो, ग्लोबल र नबिल ३ अर्ब क्लबमा (सूचीसहित)

काठमाडौँ । चालु आर्थिक वर्ष २०८२/८३ को पहिलो पाँच महिना (मंसिर मसान्त) मा वाणिज्य बैंकहरूको नाफामा संकुचन देखिएको छ। नेपाल राष्ट्र बैंकले सार्वजनिक गरेको पछिल्लो तथ्यांक अनुसार २० वाणिज्य बैंकहरूले कुल २५ अर्ब ७२ करोड ५ लाख रुपैयाँ नाफा कमाएका छन् । यो अघिल्लो वर्षको सोही अवधिको तुलनामा १५.९२ प्रतिशतले कमी हो ।

गत आर्थिक वर्षको यसै अवधिमा बैंकहरूले ३० अर्ब ५९ करोड २८ लाख रुपैयाँ नाफा आर्जन गरेका थिए । खराब कर्जा र घट्दो ब्याजदरको प्रभावका कारण बैंकहरूको आम्दानीमा दबाब परेको विश्लेषण गरिएको छ ।

नाफाका आधारमा बैंकहरूको अवस्था:

मंसिर मसान्तसम्मको अवधिमा ग्लोबल आइएमई बैंक ३ अर्ब २२ करोड नाफासहित पहिलो स्थानमा रहेको छ भने नबिल बैंक ३ अर्ब ११ करोडसहित दोस्रो स्थानमा छ। सिटिजन्स बैंक भने २४ करोड नाफासहित सूचीको अन्तिम स्थानमा देखिएको छ।

नाफा बढाउने भाग्यमानी ४ बैंक

समग्र बैंकिङ क्षेत्रको नाफा घट्दा पनि चारवटा बैंकले भने आफ्नो नाफामा वृद्धि गरेका छन् । राष्ट्रिय वाणिज्य बैंक, सानिमा बैंक, सिद्धार्थ बैंक र ग्लोबल आइएमई बैंकको नाफामा अघिल्लो वर्षको तुलनामा सुधार देखिएको छ । अन्य १६ बैंकको नाफामा भने गिरावट आएको छ ।