काठमाडौँ । नेपाली बजारमा सुन र चाँदीको भाउले पुनः नयाँ कीर्तिमान कायम गरेको छ। सोमबारको तुलनामा मंगलबार सुनको भाउ प्रतितोला १८ सय रुपैयाँले बढेर अहिलेसम्मकै उच्च विन्दुमा पुगेको हो।
नेपाल सुनचाँदी व्यवसायी महासंघका अनुसार सोमबार प्रतितोला २ लाख ७४ हजार ७०० रुपैयाँमा कारोबार भएको छापावाल सुन आज बढेर २ लाख ७६ हजार ५०० रुपैयाँ पुगेको हो । त्यस्तै, १० ग्राम छापावाल सुनको मूल्य आज २ लाख ३७ हजार ५५ रुपैयाँ कायम गरिएको छ ।
आजको बजार भाउ (प्रतितोला):
छापावाल सुन: रु २ लाख ७६ हजार ५०० रुपैयाँ (१८ सयले बढेको)
चाँदी: रु ५ हजार ३४० रुपैयाँ (१४५ ले बढेको)
चाँदी पनि हालसम्मकै महँगो
चाँदीको भाउमा पनि आज उल्लेख्य वृद्धि भएको छ । सोमबार ५ हजार १९५ रुपैयाँमा कारोबार भएको चाँदी आज तोलामा १४५ रुपैयाँले बढेर ५ हजार ३४० रुपैयाँ पुगेको छ। यो नेपाली बजारमा चाँदीको लागि पनि हालसम्मकै उच्च मूल्य हो। आज १० ग्राम चाँदीको मूल्य ४ हजार ५७८ रुपैयाँ तोकिएको छ ।
अन्तर्राष्ट्रिय बजारमा सुनको मूल्यमा भएको वृद्धिका कारण नेपाली बजारमा पनि यसको प्रभाव देखिएको व्यवसायीहरूले बताएका छन्।
