काठमाडौँ । चालु आर्थिक वर्ष २०८२/८३ को पहिलो नौ महिनामा नेपालको सार्वजनिक ऋण साढे २ खर्बभन्दा बढीले वृद्धि भएको छ ।अर्थ मन्त्रालयअन्तर्गतको सार्वजनिक ऋण व्यवस्थापन कार्यालयले सार्वजनिक गरेको चैत मसान्तसम्मको प्रतिवेदनअनुसार नेपालको कुल सार्वजनिक ऋण २९ खर्ब ३३ अर्ब ७९ करोड रुपैयाँ पुगेको छ ।
आर्थिक वर्षको सुरु अर्थात् साउन १ गतेसम्म नेपालको कुल सार्वजनिक ऋण २६ खर्ब ७४ अर्ब ४ करोड रुपैयाँ रहेको थियो । चैत मसान्तसम्म आइपुग्दा विनिमय दरमा भएको नोक्सानीसहित कुल ऋणमा २ खर्ब ५९ अर्ब ७४ करोड रुपैयाँ थप वृद्धि भएको हो ।
बढेको यस ऋणसँगै अब नेपालको कुल सार्वजनिक ऋण देशको कुल गार्हस्थ्य उत्पादनको झन्डै आधा अर्थात् ४८.०४ प्रतिशत पुगेको छ ।
आन्तरिक भन्दा बाह्य ऋणको भार बढी
कुल सार्वजनिक ऋणमध्ये बाह्य (वैदेशिक) ऋणको हिस्सा बढी छ । १५ खर्ब ४५ अर्ब ६७ करोड रुपैयाँ अर्थात् कुल ऋणको ५२.६९ प्रतिशत र जीडीपीको २५.३१ प्रतिशत हो । त्यस्तै, आन्तरिक ऋण १३ खर्ब ८८ अर्ब ११ करोड रुपैयाँ छ जुन कुल ऋणको ४७.३१ प्रतिशत र जीडीपीको २२.७३ प्रतिशत हो ।
९ महिनामा लक्ष्यको ५८ प्रतिशत सङ्कलन
सरकारले चालु आर्थिक वर्षमा कुल ५ खर्ब ९५ अर्ब रुपैयाँ ऋण परिचालन गर्ने लक्ष्य राखेको थियो । तर, चैत मसान्तसम्ममा वार्षिक लक्ष्यको ५८.४५ प्रतिशत अर्थात् ३ खर्ब ४८ अर्ब १५ करोड रुपैयाँ मात्र ऋण प्राप्ति भएको छ ।
यस अवधिमा सरकारले आन्तरिकतर्फ २ खर्ब ८३ अर्ब ६६ करोड र बाह्यतर्फ ६४ अर्ब ४८ करोड रुपैयाँ ऋण लिएको कार्यालयले जनाएको छ ।
साँवा-ब्याज भुक्तानीमै सकियो साढे २ खर्ब
सरकारले लिएको ऋणमध्ये अधिकांश रकम यसअघि लिइएको ऋणको साँवा र ब्याज भुक्तानीमा ठुलो रकम खर्च भएको छ ।
चालु आर्थिक वर्षमा साँवा र ब्याज भुक्तानीका लागि ४ खर्ब ११ अर्ब १ करोड रुपैयाँ विनियोजन गरिएकोमा चैत मसान्तसम्ममै २ खर्ब ५८ अर्ब ४४ करोड रुपैयाँ भुक्तानी भइसकेको छ । यो कुल विनियोजित बजेटको ६२.८८ प्रतिशत हो ।
कुल भुक्तानी भएको रकममध्ये आन्तरिक ऋणको साँवा–ब्याजवापत २ खर्ब ९ अर्ब ३८ करोड र बाह्य ऋणबापत ४९ अर्ब ६ करोड रुपैयाँ बुझाइएको छ ।
ऋणको साँवा-ब्याज भुक्तानीमा भएको यो खर्च देशको कुल गार्हस्थ्य उत्पादनको ४.२३ प्रतिशत हुन आउँछ ।
