काठमाडौँ । सिन्धुलीको घ्याङलेख गाउँपालिकास्थित नेपाल एसबिआई बैंकको शाखा लुटपाट घटनामा घरधनीकै मुख्य योजना रहेको खुलासा भएको छ । प्रहरीले घरधनीसहित घटनामा संलग्न ७ जनालाई पक्राउ गरी शुक्रबार सार्वजनिक गरेको हो ।
गत पुस २९ गते साँझ हायुटारमा रहेको बैंक शाखाबाट ३ करोड ७ लाख रुपैयाँ लुटिएको थियो। जिल्ला प्रहरी कार्यालय सिन्धुलीका एसपी लालध्वज सुवेदीका अनुसार बैंक रहेको घरका धनी छविलाल स्याङ्तान र उनका जेठान चतुरमान बज्युले असोजदेखि नै लुटपाटको योजना बुनेका थिए ।
यसरी भयो लुटपाट र गिरफ्तारी
योजना र तयारी: घरधनी छविलालले सूचना र हतियारको व्यवस्थापन गरेका थिए। पुस २३ र २८ गतेको प्रयास असफल भएपछि उनीहरूले पुस २९ गते लुटपाट सफल पारेका थिए।
घटनाको प्रकृति: नकाबधारी समूहले खुकुरी प्रहार गरी सुरक्षागार्ड रुद्रबहादुर कार्कीलाई घाइते बनाएका थिए। कर्मचारी र गार्डलाई बाँधेर भल्टमा रहेको रकम बोरामा भरेर उनीहरू जंगलतिर फरार भएका थिए।
प्रहरी अपरेशन: घटनालगत्तै ५० भन्दा बढी प्रहरी परिचालन गरी ‘स्वीप अपरेशन’ चलाइएको थियो। प्रहरीले जंगलका विभिन्न ठाउँमा लुकाइएको र छरिएको अवस्थामा २ करोड ६८ लाख ५५ हजार १७५ रुपैयाँ बरामद गरेको छ।
पक्राउ परेकाहरू: काभ्रेका भागवत सिंह थापा, सिन्धुलीका चतुरमान बज्यु, चितवनका शशांक श्रेष्ठ, नुवाकोटका मिलन गिरी, सिन्धुलीका विवेक मगर, छविलाल स्याङ्तान र एक बालक।
‘केटी भगाउने’ बहानामा गाडी रिजर्भ
लुटेराहरूले बनेपाबाट ‘केटी भगाउन जानुपर्ने’ बहाना बनाएर गाडी रिजर्भ गरी सिन्धुली पुगेका थिए। घटनास्थलबाट २ किलोमिटर पर चालक भागवत सिंह थापासहित गाडी नियन्त्रणमा लिएपछि अनुसन्धानको कडी फेला परेको थियो।
घरधनीकै संलग्नता किन ?
मुख्य योजनाकार भनिएका घरधनी छविलालले बैंकबाट मासिक ३० देखि ३५ हजार रुपैयाँ भाडा बुझ्दै आएका थिए। यति राम्रो आम्दानी हुँदाहुँदै पनि उनले किन लुटपाटको योजना बनाए भन्नेबारे प्रहरीले अनुसन्धान गरिरहेको छ ।
पक्राउ परेका सातै जनालाई जिल्ला अदालतबाट ५ दिनको म्याद थप गरी हिरासतमा राखिएको छ। प्रहरीले यस घटनामा अन्य व्यक्तिको पनि संलग्नता हुन सक्ने आशंकामा खोजी कार्य जारी राखेको छ ।
