अत्याधुनिक जापानी प्रविधिमा आधारित उत्पादन, निर्यात र आत्मनिर्भरताको लक्ष्य
काठमाडौँ । नेपालको औद्योगिक क्षेत्रमा स्थापित नाम श्री स्टिल लिमिटेडले सर्वसाधारणका लागि प्राथमिक सेयर (आईपीओ) निष्काशन गर्ने प्रक्रिया औपचारिक रूपमा सुरु गरेको छ ।
कम्पनीले विद्यमान धितोपत्र दर्ता तथा निष्काशन नियमावली अनुसार निकट भविष्यमा नियमनकारी निकायबाट स्वीकृति लिई सेयर जारी गर्न लागेको हो ।
यस प्रक्रियाका लागि कम्पनीले नबिल इन्भेष्टमेन्ट बैंकिङ्ग लिमिटेडलाई सेयर निष्काशन तथा बिक्री प्रबन्धकका रूपमा नियुक्त गरेको छ ।
सम्झौतामा हस्ताक्षर
फागुन १७ गते आइतबार आयोजित एक कार्यक्रमका बीच श्री स्टिलका प्रबन्ध सञ्चालक राजेश कुमार अग्रवाल र नबिल इन्भेष्टमेन्टका प्रमुख कार्यकारी अधिकृत मनिष नारायण जोशीले सम्झौता पत्रमा हस्ताक्षर गरे। कम्पनीका प्रमुख कार्यकारी अधिकृत सोमेश अग्रवालको रोहवरमा यो सम्झौता सम्पन्न भएको हो ।
प्रविधि र उत्पादनको विशेषता
श्री स्टिल नेपालको पहिलो ब्रान्ड हो, जसले ‘सिक्स स्ट्यान्ड ब्लक मिल’ को अत्याधुनिक जापानी प्रविधि प्रयोग गरी टीएमटी रिबार (डण्डी) उत्पादन गर्दै आएको छ । पूर्ण स्वचालित प्लान्टमार्फत उत्पादन हुने यी डण्डीहरू नेपालको भौगोलिक जटिलता र भूकम्पीय जोखिमका लागि उपयुक्त मानिन्छन् ।
कम्पनीको उद्देश्य:
आत्मनिर्भरता: फलाम तथा रड जन्य उत्पादनमा देशलाई आत्मनिर्भर बनाउने ।
गुणस्तर: विश्वस्तरीय अत्याधुनिक प्रविधि प्रयोग गरी उत्कृष्ट निर्माण सामग्री उपलब्ध गराउने ।
रोजगारी: औद्योगिक आधार बलियो बनाउँदै स्वदेशमै रोजगारीका अवसरहरू सिर्जना गर्ने ।
नेपाल धितोपत्र बोर्ड (सेबोन) बाट स्वीकृति पाएपछि कम्पनीले सेयर निष्काशनको मिति र मूल्य सार्वजनिक गर्नेछ। यस निष्काशनले कम्पनीको वित्तीय संरचनालाई थप मजबुत बनाउनुका साथै सर्वसाधारणलाई पनि कम्पनीको हिस्सेदार बन्ने अवसर प्रदान गर्नेछ ।
