दुई कम्पनीले कुल ७० लाख ९० हजार कित्ता सेयर बजारमा ल्याउँदै
काठमाडौँ । नेपाल धितोपत्र बोर्ड (सेबोन) ले दुईवटा कम्पनीलाई प्राथमिक सार्वजनिक निष्कासन (आईपीओ) बिक्रीका लागि अन्तिम अनुमति प्रदान गरेको छ। बोर्डको आइतबार बसेको बैठकले ‘सोपान फर्मास्युटिकल्स लिमिटेड’ र ‘याम्बलिङ हाइड्रोपावर लिमिटेड’ लाई सेयर निष्कासनको स्वीकृति दिएको हो।
१. सोपान फर्मास्युटिकल्स लिमिटेड
औषधि उत्पादन क्षेत्रको यस कम्पनीले ४२ करोड ९० लाख रुपैयाँ बराबरको आईपीओ जारी गर्ने अनुमति पाएको छ । जसअनुसार कम्पनीले १०० रुपैयाँ अंकित मूल्यका कुल ४२ लाख ९० हजार कित्ता सेयर सर्वसाधारणका लागि बिक्री खुला गर्नेछ ।
कम्पनीको सेयर निष्कासन तथा बिक्री प्रबन्धकको जिम्मेवारी एनएमबि क्यापिटल लिमिटेडले पाएको छ ।
२. याम्बलिङ हाइड्रोपावर लिमिटेड
ऊर्जा क्षेत्रको याम्बलिङ हाइड्रोपावरले २८ करोड रुपैयाँ बराबरको आईपीओ निष्कासन गर्नेछ । कम्पनीले १०० रुपैयाँ अंकित मूल्यका कुल २८ लाख कित्ता सेयर सर्वसाधारण, स्थानीय बासिन्दा र वैदेशिक रोजगारीमा रहेका नेपालीका लागि निष्कासन गर्ने अनुमति पाएको हो ।
यस कम्पनीको बिक्री प्रबन्धकका रूपमा मुक्तिनाथ क्यापिटल लिमिटेड रहेको छ ।
बोर्डबाट स्वीकृति पाएसँगै अब दुवै कम्पनीले छिट्टै आह्वानपत्र सार्वजनिक गरी सेयर निष्कासनको मिति तय गर्नेछन् । पछिल्लो समय धितोपत्र बोर्डमा नेतृत्व आएसँगै रोकिएका आईपीओ निष्कासन प्रक्रियाले तीव्रता पाउन थालेको छ, जसले पुँजी बजारका लगानीकर्तामा उत्साह थपेको छ ।
