नयाँ दिल्ली । भारत सरकारले आज (फेब्रुअरी १) नयाँ आर्थिक वर्ष २०२६/२७ को केन्द्रीय बजेट संघीय संसद्मा प्रस्तुत गर्दैछ । भारतीय वित्तमन्त्री निर्मला सीतारमणले आज बिहान ११ बजे लोकसभामा बजेट भाषण सुरु गर्नेछिन् ।
वित्तमन्त्री सीतारमणका लागि यो लगातार नवौँ बजेट प्रस्तुति हो, जुन भारतीय संसदीय इतिहासमा एउटा नयाँ कीर्तिमान समेत हो। यसअघि उनले मोरारजी देसाईको लगातार ६ पटक बजेट पेश गर्ने रेकर्ड तोडिसकेकी छिन् ।
बजेटका मुख्य विशेषता र अपेक्षा:
आयकरमा राहत:
मध्यम वर्गीय परिवार र कर्मचारीका लागि आयकर छुटको सीमा (Standard Deduction) ७५ हजारबाट बढाएर १ लाख भारु पुर्याउने अपेक्षा गरिएको छ। साथै, नयाँ कर प्रणालीअन्तर्गत करमुक्त आयको सीमामा समेत वृद्धि हुन सक्ने अनुमान छ।
कृषि र किसान:
‘प्रधानमन्त्री कृषि सम्मान निधि’ अन्तर्गत किसानले पाउँदै आएको वार्षिक ६ हजार भारुलाई बढाएर १२ हजार पुर्याउने र बालीको न्यूनतम समर्थन मूल्य (MSP) वृद्धि गर्ने मागलाई बजेटले सम्बोधन गर्न सक्ने देखिएको छ।
आयात शुल्क:
सुन, चाँदी र अन्य केही महत्वपूर्ण कच्चा पदार्थको आयात शुल्क घटाएर स्वदेशी उत्पादन र उपभोगलाई प्रोत्साहन दिने सम्भावना छ।
पूर्वाधार र प्रविधि:
‘डिजिटल इन्डिया’ र पूर्वाधार विकासका लागि ठूलो वैदेशिक लगानी भित्र्याउन पुँजीगत खर्चमा थप वृद्धि हुने आकलन गरिएको छ।
बजेटको पृष्ठभूमि:
भारतीय संविधानको धारा ११२ अनुसार हरेक वर्ष अप्रिल १ देखि नयाँ आर्थिक वर्ष सुरु हुनुअघि बजेट ल्याउने प्रावधान छ । गत वर्ष वित्तमन्त्री सीतारमणले ५०.६५ लाख करोड भारु बराबरको बजेट ल्याएकी थिइन् । यस वर्ष भारतीय अर्थतन्त्र ७.४ प्रतिशतले वृद्धि हुने प्रक्षेपण गरिएको सन्दर्भमा यो बजेटले आर्थिक सुधारका थप कदमहरू चाल्ने विश्वास गरिएको छ ।
बजेट भाषण सकिएपछि सबै सरकारी दस्तावेजहरू ‘युनियन बजेट मोबाइल एप’ र सरकारी पोर्टलमा उपलब्ध हुनेछन् ।
