काठमाडौँ । राष्ट्रिय स्वतन्त्र पार्टी (रास्वपा) का सांसद तथा पूर्व सञ्चारमन्त्री जगदीश खरेल ‘भीआईपी रवाफ’ देखाएको भन्दै पुनः विवादमा तानिएका छन् ।
मङ्गलवार रास्वपाले आयोजना गरेको अभिमुखीकरण कार्यक्रममा सहभागी हुन पुग्दा गाडीको ढोका आफैँ नखोली होटलका कर्मचारीलाई खोल्न लगाएपछि सामाजिक सञ्जालमा उनको व्यापक आलोचना भएको हो ।
सोही कार्यक्रममा रास्वपाका अर्का सांसद राजुनाथ पाण्डेले पनि गार्डलाई ढोका खोल्न लगाएको भिडियो सार्वजनिक भएपछि नागरिक स्तरबाट ‘नयाँ र पुराना दलमा के फरक?’ भन्दै प्रश्न उठाइएको छ ।
सामाजिक सञ्जालका प्रतिनिधि प्रतिक्रिया:
खरेलको यो शैलीप्रति सञ्चारकर्मीदेखि सर्वसाधारणसम्मले व्यङ्ग्य र कटाक्ष गरेका छन्:
राजेन्द्र बानियाँ (सञ्चारकर्मी): “यो भिडियो पक्का फेक वा एआईले बनाएको होला । नयाँ संस्कारका द्योतक जगदीशजीले गाडीको ढोका अरूलाई खोल्न लगाउनुहुन्न होला ।”
अनुप अधिकारी (एक्स प्रयोगकर्ता): “गाडीको ढोका पनि अरूले नै खोलिदिनु पर्ने ? यी पुरानाभन्दा कसरी फरक भए ?”
प्रदीप दाहाल (फेसबुक): “धन्न ढोका खोल्न नसके पनि लगाउन चाहिँ सक्नुहुने रैछ, खुसी लाग्यो ।”
अन्य प्रयोगकर्ताहरूले महावीर पुनको सादगीपनसँग तुलना गर्दै खरेलले आफ्नो बाटो बिराएको र ‘मन्त्रीको स्वाद’ चाखेपछि राजनीतिक नशा लागेको भन्दै टिप्पणी गरेका छन् ।
बचाउमा पनि उठे स्वरहरू:
आलोचना भइरहँदा केहीले भने यसलाई होटलको सामान्य ‘हस्पिटालिटी’ (आतिथ्य) का रूपमा अर्थ्याएका छन् । जीवन पन्त, राजेन्द्र बिमली लगायतका प्रयोगकर्ताले ‘स्टार होटल’हरूमा कर्मचारीले ढोका खोलिदिनु नियम नै भएको र यसलाई बढाइचढाइ गर्न नहुने तर्क गरेका छन् ।
पुरानै विवादको पुनरावृत्ति:
खरेल यसअघि सञ्चारमन्त्री रहँदा पनि यस्तै घटनाका कारण विवादमा परेका थिए । बालुवाटारमा सुरक्षाकर्मीले सलाम ठोकेर ढोका खोलिदिएपछि मात्र गाडीबाट ओर्लिएको २२ सेकेन्डको भिडियो त्यतिबेला भाइरल भएको थियो । विगतमा नेताहरूलाई कडा प्रश्न गर्ने पत्रकारको छवि बनाएका खरेल आफैँ सत्तामा पुगेपछि ‘राजतन्त्रकालीन झल्को’ दिने गरी प्रस्तुत भएको भन्दै सुरक्षा विज्ञहरूले समेत त्यसलाई ‘अनावश्यक रवाफ’ को संज्ञा दिएका थिए ।
पछिल्लो घटनाले रास्वपाका नेताहरूमाथि लाग्दै आएको ‘संस्कार परिवर्तन’को नारामाथि नै गम्भीर नैतिक प्रश्न खडा गरिदिएको छ ।
