धनुषा । मधेस प्रदेशका मुख्यमन्त्री कृष्णप्रसाद यादवले प्रदेश सरकारलाई संवैधानिक रूपमा दिइएका अधिकार कार्यान्वयन भएमा प्रदेशका धेरै समस्या समाधान प्रदेशबाटै गर्न सकिने बताएका छन् ।
जनकपुरमा निर्माण गरिने मधेस प्रदेश प्रहरी कार्यालय भवनको आज शिलान्यास गर्दै उनले मधेसको समग्र विकासमा नै आफ्नो ध्यान केन्द्रित रहेको बताए । उनले सङ्घीय व्यवस्थाको पूर्ण कार्यान्वयन भएमा मधेसका नागरिकले आफ्ना अधिकार प्राप्तिका लागि बारम्बार काठमाडौं धाउन नपर्ने बताए ।
प्रदेश सरकारले शिक्षा, स्वास्थ्य, कृषि, पूर्वाधार र रोजगारीलाई प्राथमिकतामा राखेर ती क्षेत्रको विकासका निम्ति हरसम्भव प्रयास गरिरहेको बताए । पर्याप्त स्रोतसाधनको अभावमा जनअपेक्षा पूरा गर्न कठिन भएको उनको कथन थियो ।
संविधानले दिएको अधिकार अझै पाएनौँ
मुख्यमन्त्री यादवले प्रदेश सरकार बिना प्रहरी प्रशासन चलिरहेको भन्दै असन्तुष्टि व्यक्त गरे । विश्वमा कतै पनि बिना प्रहरी प्रशासनको सरकार नहुने भन्दै उनले नेपालमा मात्रै प्रदेश सरकारहरूले यस्तो नियति भोगिरहेको बताए । जनकपुरमा आयोजित एक कार्यक्रमलाई सम्बोधन गर्दै मुख्यमन्त्री यादवले संविधानले परिकल्पना गरेको अधिकार आठ वर्षभन्दा बढी समय बितिसक्दा पनि प्रदेशले नपाएको गुनासो गरे ।
राष्ट्रिय स्वतन्त्र पार्टीका वरिष्ठ नेता बालेन्द्र साहले जनकपुरको तिरहुतिया गाछीमा ‘अब अधिकारका लागि होइन, पशुपति दर्शन गर्न मात्र आउनू’ भनी दिएको अभिव्यक्तिको स्मरण गराउँदै प्रदेशले नमागीकन अधिकार दिन खोजेकोमा साहलाई धन्यवाद समेत दिए । मुख्यमन्त्री यादवले मधेस प्रदेशमा प्रहरीको भौतिक संरचना अत्यन्तै दयनीय रहेको बताए । माओवादी द्वन्द्वकालमा क्षति भएका भग्नावशेष भवनहरूमा समेत प्रहरीहरू अहिले बस्न बाध्य रहेको उल्लेख गर्दै उनले यसको सुधार गर्नुपर्ने आवश्यकता औंल्याए ।
‘जेन(जी’ आन्दोलनका क्रममा धेरै ठाउँमा प्रहरीका सवारी साधनहरू जलाइएको र नष्ट गरिएको भन्दै उनले त्यसको पूर्ति गर्नुपर्ने दायित्व पनि थपिएको बताए । प्रदेश प्रहरीलाई सुसम्पन्न बनाउन प्रदेश सरकारको मात्र नभई संघीय सरकारको पनि उत्तिकै जिम्मेवारी रहेको उनको भनाइ छ । सीमित साधनस्रोतका बाबजुद प्रदेश सरकारले प्रत्येक वर्ष प्रहरीलाई सहयोग गरिरहेको उनले जानकारी दिए ।
उनले भने, ‘ मैले डीआईजी सावसँग पनि पटकपटक कुरा गर्दै गर्दा यहाँ मधेस प्रदेश प्रहरीलाई सुसम्पन्न बनाउनको लागि उहाँहरूको आवश्यकता पूरा गर्नको लागि म मात्रै होइन, मधेस प्रदेश सरकार मात्रै होइन, हाम्रो संघीय जिम्मेवारी पनि छ । तरपनि हाम्रो साधनस्रोतको सीमामा रहेर हामी पटकपटक प्रत्येक वर्ष सहयोग गरिरहेका छौँ । अहिले पनि हामीले धेरैथोक गर्नुपर्ने रहेछ यो प्रदेशमा । धेरै ठाउँमा पुराना भग्नावशेष बिल्डिङहरू छन्, जो माओवादीका पालामा पनि त्यसलाई क्षति गरेको बिल्डिङमा पनि प्रहरीहरू अहिले बस्न बाध्य भएका छन् । त्यो कामहरू पनि हामीले गर्नुपर्ने रहेछ । र अर्को एउटा खुशी के लागेको छ भने, अहिलेको जुन बदलिएको परिस्थिति २०८२ फागुन २१ गतेमा सम्पन्न निर्वाचनको परिणामअनुरूप यहाँ आउनुभएका त्यो दलका नेताज्युले जनकपुरको यो तिरहुतिया गाछीमा जुन भन्नुभएको कुरा हाम्रो मधेस प्रदेशको लागि ठूलो सुखद् र गर्वका कुरा हुन् र विश्वास हामीले लिएका छौँ । उहाँले एउटा बोलेको कुरा मैले सुनेको छु । अब अहाँ सब जनकपुर पशुपति दर्शन करय आऊ, अधिकारक लेल नै आऊ । मलाई खुशी लागेको छ, हामी यो आठ वर्षभन्दा बढी भइसक्यौँ, संविधानले परिकल्पना गरेको अधिकार पनि प्रदेशले पाएको छैन । यो प्रदेश, यो सरकार बिना प्रहरी प्रशासनको सरकार छ र यो विश्वमा एउटा नभएको कुरा हो। विश्वमा कतै कुनै सरकार बिना प्रहरी प्रशासनको छैन र यो नेपालमा मात्रै बिना प्रहरी प्रशासनको सरकार हामी चलाइरहेका छौँ । र वरिष्ठ नेता माननीय बालेन्द्र साहजीले जुन भन्नुभएको कुरा, म यही मञ्चबाट पनि उहाँलाई रिमाइन्ड गराउन चाहन्छु कि हामीले नमागीकन तपाईंले दिन खोज्नुभएको छ, त्यसको लागि तपाईंलाई धन्यवाद पनि छ ।’
मुख्यमन्त्री यादवले २०८२ फागुन २१ गते सम्पन्न निर्वाचनलाई भयरहित, निष्पक्ष र शान्तिपूर्ण रूपमा सम्पन्न गराउन भुमिका खेल्ने सुरक्षा निकायको उच्च प्रशंसा गरे ।
