कांग्रेस विवाद समाधानका लागि त्रिपक्षीय वार्ता: देउवालाई ब्रिफिङ गर्न सरकारी र इतर पक्ष महाराजगञ्जमा

काठमाडौँ । नेपाली कांग्रेसभित्रको आन्तरिक विवाद समाधानका लागि गठन गरिएको त्रिपक्षीय वार्ता टोलीका सदस्यहरू सभापति शेरबहादुर देउवालाई भेट्न महाराजगञ्ज पुगेका छन् । मंगलबार बिहान भएको पहिलो चरणको वार्ता विना निष्कर्ष टुङ्गिएपछि संस्थापन पक्षका नेताहरू देउवालाई ब्रिफिङ गर्न पुगेका हुन् ।

वार्ताको प्रयास र अवरोध

भृकुटीमण्डपमा जारी विशेष महाधिवेशन र संस्थापन पक्षबीचको दूरी कम गर्न सभापति देउवा र नेता शेखर कोइरालाको सहमतिमा वार्ता समिति बनाइएको थियो । समितिमा बालकृष्ण खाण, रमेश लेखक, सहमहामन्त्री जीवन परियार र डा. मिनेन्द्र रिजाल सहभागी छन् ।

वार्ता टोलीका एक सदस्यका अनुसार विशेष महाधिवेशन पक्षधर (महामन्त्रीद्वय गगन-विश्वप्रकाश समूह) ले राखेका मागहरूका बारेमा सभापति देउवालाई जानकारी गराउन नेताहरू महाराजगञ्ज पुगेका हुन् ।

अस्वाभाविक मागको दाबी

संस्थापन पक्षका नेताहरूले विशेष महाधिवेशन पक्षधरले ‘अस्वाभाविक र असम्भव’ मागहरू राखेका कारण सहमति जुट्न कठिन भइरहेको दाबी गरेका छन् । अर्कोतर्फ, विशेष महाधिवेशन पक्षधरले भने वर्तमान कार्यसमितिको वैधता सकिएको भन्दै नयाँ नेतृत्व चयनको विकल्प नभएको अडान राख्दै आएका छन् ।

पार्टीभित्रको एउटा ठूलो पङ्क्तिले विशेष महाधिवेशन जारी राखेको छ भने संस्थापन पक्षले यसलाई अहिलेसम्म वैधानिकता दिन अस्वीकार गरिरहेको छ । बिहानको छलफल निष्कर्षविहीन भएपछि आजै दिउँसो पुनः दोस्रो चरणको वार्ता बस्ने तयारी छ ।

छुट्ला नी !!

कांग्रेस विशेष महाधिवेशन: नेतृत्व चयनका लागि निर्वाचन कार्यतालिका सार्वजनिक, आजै मनोनयन र राति मतदान