काठमाडौँ । अर्थमन्त्री विष्णुप्रसाद पौडेलले सङ्घीय आयोजनामा तीन करोड रुपैयाँभन्दा कम बजेट विनियोजन हुनुका चार प्रमुख कारणहरू स्पष्ट पारेका छन्। मङ्गलबार प्रतिनिधिसभा बैठकमा अर्थ मन्त्रालयको विनियोजन शीर्षकमाथि उठेका प्रश्नहरूको जवाफ दिँदै उनले यस्तो बताएका हुन् ।
कम बजेट विनियोजन हुनुका कारणहरू:-
अर्थमन्त्री पौडेलका अनुसार, सङ्घीय आयोजनामा तीन करोडभन्दा कम बजेट विनियोजन हुनुका कारणहरू यस प्रकार छन्:-
क्रमागत आयोजनाको दायित्व भुक्तानी: तीन करोडभन्दा कम लागतका क्रमागत आयोजनाहरूमा अघिल्लो वर्षको दायित्व भुक्तानीका लागि मात्रै कम बजेट विनियोजन भएको हुन सक्छ।
सङ्घीय सरकारको एकल अधिकार क्षेत्र: सङ्घीय सरकारको एकल अधिकार क्षेत्रभित्र पर्ने र तीन करोडभन्दा कम लागत अनुमान गरिएका आयोजनाहरूमा पनि यस्तो रकम विनियोजन गरिएको छ।
विपद्पछिको पुनर्निर्माण: विपद् व्यवस्थापनपछिको पुनर्निर्माण कार्यमा तीन करोडभन्दा कम लागत भएमा तोकिएको सीमाभन्दा कम बजेट विनियोजन गरिएको छ।
अघिल्लो वर्षको दायित्व भुक्तानी प्रयोजन: चालु आर्थिक वर्षको बजेटमा सङ्घीय आयोजनामा तीन करोडभन्दा कम बजेट नछुट्याउने नीति लिइएको थियो। माथि उल्लेखित विशेष अवस्थाहरूबाहेक यो नीतिमा आफू दृढ रहेको अर्थमन्त्री पौडेलले स्पष्ट पारेका छन्।
अर्थमन्त्री पौडेलले यी विशेष परिस्थितिहरूमा मात्र तीन करोडको सीमा लागू नहुने र अन्य अवस्थामा भने सङ्घीय आयोजनाहरूमा न्यूनतम तीन करोड बजेट विनियोजन गर्ने नीतिमा सरकार प्रतिबद्ध रहेको जनाए।
