काठमाडौँ । अमेरिकी पूर्वराष्ट्रपति डोनाल्ड ट्रम्पले इजरायली प्रधानमन्त्री बेन्जामिन नेतन्याहूमाथि इजरायलमा चलिरहेको भ्रष्टाचार मुद्दालाई ‘राजनीतिक प्रतिशोधका लागि गरिएको षड्यन्त्र’ भन्दै आपत्ति जनाएका छन्। ट्रम्पले अमेरिकाले नेतन्याहूलाई यस समस्याबाट बचाउने सीएनएनलाई बताएका छन्।
ट्रम्पले आफ्नो सामाजिक सञ्जाल ट्रुथ सोसलमा एक पोस्ट गर्दै भनेका छन्, “अमेरिकालाई समस्या पर्दा इजरायलले सहयोग गरेको थियो। अब नेतन्याहूलाई समस्या पर्दा अमेरिकाले बचाउनेछ।”
नेतन्याहूविरुद्धको मुद्दा तत्काल खारेज गर्नुपर्ने ट्रम्पको जोड छ। उनले भने, “यो न्याय होइन, यो त राजनीतिक सिकार हो। नेतन्याहूजस्तो महान् नायक, जसले देशको लागि ज्यान जोखिममा राखे, आज अदालतको कठघरामा छन्। यो मुद्दा तुरुन्त खारेज गरिनुपर्छ वा राष्ट्रपतिले क्षमादान दिनुपर्छ।”
ट्रम्पको यो भनाइ उनले इजरायलप्रति कठोर शब्दहरू प्रयोग गरेको एक दिनपछि आएको हो। इजरायल र इरानबीचको युद्धविराम नाजुक अवस्थामा हुँदा उनले इजरायललाई त्यसको उल्लङ्घन नगर्न चेतावनी दिएका थिए।
ट्रम्पले थप भने, “इजरायलको अस्तित्वका लागि इरानजस्तो खतरनाक शत्रुलाई सामना गर्दै हामीले सँगै नर्कजस्तो युद्ध लड्यौँ। त्यो बेला नेतन्याहूजस्तो बलियो, तेज र समर्पित नेता नभएको भए इजरायलले ठूलो क्षति व्यहोर्नुपर्ने थियो।”
ट्रम्पले नेतन्याहूको बलियो नेतृत्वका कारण सम्भावित ठूलो आणविक खतरा समयमै समाप्त भएको दाबी गर्दै उनलाई इतिहासकै महान् लडाकु प्रधानमन्त्रीको संज्ञा दिएका छन्। ट्रम्पले नेतन्याहूलाई “अमेरिकासँग सबैभन्दा राम्रो तालमेल मिलाउने इजरायली नेता” पनि भनेका छन्। -सीएनएन
