काठमाडौँ । नाडा अटोमोबाइल्स एशोसिएसन अफ नेपालका अध्यक्ष सुरेन्द्रकुमार उप्रेतीको नेतृत्वमा गएको एक प्रतिनिधिमण्डलले सोमबार अर्थमन्त्री डा. स्वर्णिम वाग्लेसँग भेटवार्ता गरेको छ । अर्थ मन्त्रालयमा भएको उक्त भेटमा नेपालको अटोमोबाइल क्षेत्रको वर्तमान अवस्था र सुधारका उपायहरूका विषयमा विस्तृत छलफल भएको छ ।
भेटका क्रममा अध्यक्ष उप्रेतीले अर्थमन्त्रीलाई सफल कार्यकालको शुभकामना दिँदै अटोमोबाइल क्षेत्रलाई चलायमान बनाउन सरकारले उदार नीति ल्याउने अपेक्षा व्यक्त गरे । यसबाट सरकारी राजस्वमा वृद्धि हुनुका साथै रोजगारीका अवसरहरू समेत बढ्ने उनको भनाइ थियो ।
राजस्वको दायरा विस्तार र निजी क्षेत्रमैत्री नीतिको आश्वासन
छलफलका क्रममा अर्थमन्त्री डा. वाग्लेले सरकारले राजस्व संकलन वृद्धि गर्ने सम्बन्धमा गम्भीरतापूर्वक विचार गरिरहेको बताए । उनले भने, “सरकार राजस्वको दायरा विस्तार गर्दै र करको दरलाई व्यावहारिक बनाउँदै निजी क्षेत्रमैत्री नीति ल्याउन प्रतिबद्ध छ।” साथै, मन्त्री वाग्लेले अनियमितता हटाउन पहल गर्ने, सडक पूर्वाधारमा लगानी बढाउने र आगामी बजेटका सन्दर्भमा नाडासँग पुनः परामर्श गर्ने आश्वासन दिए ।
स्वदेशी उद्योग र गुणस्तर मापनको चुनौती
अध्यक्ष उप्रेतीले नेपालमा टायर, ट्युब, ब्याट्री, लुब्रिकेन्ट्स र हेलमेट जस्ता वस्तुहरूको उत्पादन भइरहे पनि सरकारसँग गुणस्तर मापन गर्ने पर्याप्त संयन्त्र नहुँदा व्यवसायीले समस्या भोग्नुपरेको गुनासो गरे । उनले अटोमोबाइल उद्योगका लागि आवश्यक कच्चा पदार्थ आयातमा सहुलियत दिनुपर्ने माग गर्दै नाडाको तर्फबाट ३६ बुँदे लिखित सुझाव समेत पेस गरे ।
विद्युतीय सवारी र सीमा सुरक्षाको विषय
छलफलमा नाडाका निवर्तमान अध्यक्ष करण चौधरीले नेपालमा अटोमोबाइल कम्पोनेन्ट उद्योगको ठूलो सम्भावना रहेको औंल्याए । विशिष्ट सल्लाहकार राजनबाबु श्रेष्ठले विद्युतीय सवारी साधनको प्रवर्द्धनका लागि स्थिर नीतिको खाँचो रहेको बताए । उनले भारतमा जीएसटी (GST) घटेका कारण सीमा क्षेत्रबाट हुने अवैध पैठारी बढेको भन्दै निगरानी बढाउन माग ग/] .
त्यसैगरी, उपाध्यक्ष विक्रम सिंघानियाले सरकारले नेपाली उद्योगहरूलाई विशेष प्रोत्साहन दिनुपर्नेमा जोड दिए । भेटघाटमा नाडाका उपाध्यक्षद्वय अभिक ज्योति र राजनबाबु श्रेष्ठ, महासचिव मिलनबाबु मल्ल, कोषाध्यक्ष पंकज अग्रवाल र सहकोषाध्यक्ष नीलमणि पाठक लगायतको उपस्थिति रहेको थियो ।
