काठमाडौँ । नाडा अटोमोबाइल्स् एशोसिएशन अफ नेपालको प्रस्तुति र पश्चिमाञ्चल अटोमोबाइल डिलर्स एशोसिएशन (वाडा) को आयोजनामा पोखरामा ‘दोस्रो नाडा प्रजेन्ट्स वाडा अटो शो २०२६’ आयोजना हुने भएको छ । यही चैत ११ गतेदेखि १५ गतेसम्म पोखराको लेकसाइडस्थित तालबाराही चोकको खेल मैदानमा यो भव्य प्रदर्शनी चल्नेछ ।
गण्डकी प्रदेशकै बृहत् यस अटो प्रदर्शनीको प्रवर्द्धक पोखरा महानगरपालिका रहेको छ भने व्यवस्थापन ‘ग्लोबल एक्सपोजिसन एण्ड म्यानेजमेन्ट सर्भिसेज’ (जेम्स) ले गरिरहेको छ ।
प्रदर्शनीका मुख्य आकर्षणहरू
यसपटकको अटो शोमा सवारी साधनका अतिरिक्त नयाँ प्रविधि र ऐतिहासिकतालाई पनि जोड दिइएको छ:
भिन्टेज कार शो: नयाँ पुस्तालाई पुराना र ऐतिहासिक मोडलका कारहरूबारे जानकारी दिन विशेष प्रदर्शनी।
रोबोटिक्स प्रदर्शन: आधुनिक प्रविधिसँग साक्षात्कार गराउन युनीट्रि जी वान ह्युमानोइड, युनीट्रि गो टु र चंखे जस्ता रोबोटहरू प्रदर्शनमा राखिने।
विविध स्टलहरू: प्रदर्शनीमा १६ वटा ४–पाङ्ग्रे, ६ वटा लाइट कमर्शियल, १० वटा २–पाङ्ग्रे र १ हेभी कमर्शियल ब्राण्डका सवारी साधन रहनेछन्। साथै, लुब्रिकेन्ट, टायर, ग्यारेज उपकरण र वित्तीय संस्थाका गरी २० वटा स्टलहरू रहनेछन्।
सहभागी ब्राण्डहरू
प्रदर्शनीमा टाटा, हुण्डाई, सुजुकी, बिवाइडी (BYD), एमजी (MG), किया, निसान, रोयल इन्फिल्ड, यामाहा, टिभिएस जस्ता ३० भन्दा बढी प्रख्यात अन्तर्राष्ट्रिय ब्राण्डका सवारी साधनहरूको सहभागिता रहनेछ।
पाँच दिनमा ४५ हजार अवलोकनकर्ताको अपेक्षा
आयोजकले ५ दिनसम्म चल्ने यस मेलामा करिब ४५ हजार आगन्तुकहरूले अवलोकन गर्ने लक्ष्य राखेको छ। अटो व्यवसायको सुदृढीकरण, क्षेत्रीय बजारको प्रवर्द्धन र आन्तरिक पर्यटनमा टेवा पुऱ्याउनु यस प्रदर्शनीको मुख्य उद्देश्य रहेको आयोजकले जनाएको छ।
टिकटमा विशेष अफर
टिकटिङ पार्टनर खल्ती एप मार्फत टिकट खरिद गर्दा क्युआर पार्टनर युनियन पे द्वारा विशेष क्यास ब्याकको व्यवस्था गरिएको छ:
दैनिक पहिलो १०० जना साधारण टिकटमा ५० प्रतिशत क्यास ब्याक।
दैनिक पहिलो १०० जना विद्यार्थी टिकटमा १०० प्रतिशत क्यास ब्याक।
सहयोगी संस्थाहरू (पार्टनर्स)
प्रदर्शनीलाई सफल बनाउन राइड इनर्जी (पावर्ड बाई), शिखर इन्स्योरेन्स (इन्स्योरेन्स पार्टनर), दीर्घायु पोखरा हस्पिटल (हस्पिटल पार्टनर) लगायत खल्ती, युनियन पे, टेम्पल बेल, पोखरा इन्टरनेट र सिटिजन फर्निचर जस्ता प्रतिष्ठित संस्थाहरूले सहकार्य गरेका छन् ।
