काठमाडौँ । खाद्य तथा कृषिजन्य उत्पादनको व्यापार गर्दै आएको नारायणी फुड प्रालिले सन् २०२४ मा ९० करोड ४० लाख रुपैयाँको व्यापार गरेको छ । यो सन् २०२३ को ८७ करोड ६० लाख रुपैयाँको तुलनामा ३.२६ प्रतिशतले बढेको हो।
कम्पनीको प्रोफाइल र उत्पादन
सन् २००८ मा स्थापना भएको नारायणी फुडले सन् २०१३ देखि व्यावसायिक कारोबार सुरु गरेको थियो। कम्पनीले विभिन्न प्रकारका अन्न तथा दालहरू बिक्री वितरण गर्दै आएको छ । यसमा मुसुरो दाल, अस्ट्रेलियन चना दाल, मास दाल, हरियो मुङ दाल, अराहर दाल, हरियो केराउ, सेतो केराउ, पपकर्न र राज्मा जस्ता उत्पादनहरू पर्दछन् ।
कम्पनीले विभिन्न कृषिजन्य सामग्रीहरू आयात गरी प्रशोधन गरेर नेपाली बजारमा बिक्री गर्दै आएको छ । केयल ग्रुपद्वारा सञ्चालित यस कम्पनीका अध्यक्ष सत्यनारायण केयल हुन्, जससँग उत्पादन र व्यापारको राम्रो अनुभव छ ।
कर्जा रेटिङ
नारायणी फुडले दीर्घकालीन तथा अल्पकालीन कर्जाका लागि कुल ९७ करोड ५२ लाख रुपैयाँको रेटिङ गराएको छ। यसमध्ये दीर्घकालीन कर्जाका लागि ३४ करोड २ लाख रुपैयाँ र अल्पकालीन कर्जाका लागि ६३ करोड ५० लाख रुपैयाँको रेटिङ गरिएको छ ।
