काठमाडौँ । मध्यपूर्वमा बढ्दो भूराजनीतिक तनावका कारण सोमबार एसियाली बजारमा भारी गिरावट आएको छ। यसैबीच, तेलको मूल्य पाँच महिनाकै उच्च बिन्दुमा पुगेको छ। अमेरिकाले इजरायलसँग मिलेर इरानको आणविक स्थलहरूमा आक्रमण गरेपछि विश्व ऊर्जा बजारमा आपूर्ति अवरोधको चिन्ता बढेको हो।
इरान विश्वको नवौँ ठूलो तेल उत्पादक राष्ट्र हो, जसले दैनिक करिब ३.३ मिलियन ब्यारेल तेल उत्पादन गर्छ। यसको लगभग आधा मात्र निर्यात गरिन्छ भने बाँकी घरेलु खपतका लागि राखिन्छ।
विश्लेषकहरूका अनुसार, यदि इरानले अमेरिकाको कारबाहीको प्रतिकारमा स्ट्रेट अफ होरमुज (Strait of Hormuz) बन्द गर्ने निर्णय गर्छ भने, यसले विश्वव्यापी ऊर्जा आपूर्तिमा गम्भीर असर पार्न सक्छ। स्ट्रेट अफ होरमुज विश्वको सबैभन्दा महत्त्वपूर्ण तेल ढुवानी मार्ग हो।
बजारको अवस्था:
ब्रेन्ट क्रूडको मूल्य २.७ प्रतिशतले वृद्धि भएर प्रति ब्यारेल ७९.१२ डलर पुगेको छ।
अमेरिकी क्रूडको मूल्य २.८ प्रतिशतले बढेर ७५.९८ डलर पुगेको छ।
एसियाली बजारमा पनि गिरावट देखिएको छ। टोकियोको निक्केई सूचकांक ०.६ प्रतिशतले घटेको छ। सियोल १.४ प्रतिशतले र सिड्नी ०.७ प्रतिशतले तल झर्दा, जापानबाहेक एसिया–प्रशान्त क्षेत्रको एससिएल सूचकांक पनि ०.५ प्रतिशतले घटेको छ। यसबीच अमेरिकी बजारले भने केही स्थिरता देखाएको छ।
