काठमाडौँ । सरकारले चालू आर्थिक वर्ष २०८२/८३ को पहिलो ६ महिना (पुस मसान्त) सम्ममा ५ खर्ब ८१ अर्ब ४१ करोड रुपैयाँ राजस्व सङ्कलन गरेको छ। यो सङ्कलन पुस मसान्तसम्मको लक्ष्यको तुलनामा ८१.७५ प्रतिशत मात्र हो।
लक्ष्य र वास्तविक सङ्कलनको खाडल
अर्थ मन्त्रालयका अनुसार चालू आर्थिक वर्षका लागि कुल १४ खर्ब ८० अर्ब रुपैयाँ राजस्व उठाउने लक्ष्य राखिएको छ । सोही लक्ष्यअनुसार पुससम्ममा ७ खर्ब ११ अर्ब २१ करोड रुपैयाँ सङ्कलन हुनुपर्ने थियो। तर, वास्तविक सङ्कलन लक्ष्यभन्दा झन्डै १ खर्ब २९ अर्ब ८० करोड रुपैयाँले न्यून देखिएको छ।
पुस ३० गते, अर्थात् दोस्रो त्रैमासको अन्तिम दिन मात्रै सरकारले २० अर्ब २६ करोड रुपैयाँ राजस्व सङ्कलन गरेको मन्त्रालयले जनाएको छ।
राजस्व न्यून हुनुका कारण
मन्त्रालयका प्रवक्ता टङ्कप्रसाद पाण्डेयले पछिल्लो समय देखिएका विभिन्न आन्दोलन र असहज परिस्थितिका कारण लक्ष्य प्राप्तिमा चुनौती थपिएको बताए । राजस्वको दायरा विस्तार र चुहावट नियन्त्रणमा केही समस्या देखिए पनि आउँदा दिनमा लक्ष्य भेट्टाउने गरी काम गर्न मातहतका सबै निकायलाई निर्देशन दिइएको उनले जानकारी दिए ।
पछिल्लो समय अर्थतन्त्रमा देखिएको सुस्तता र आयातमा आएको उतारचढावले पनि भन्सार तथा आन्तरिक राजस्व सङ्कलनमा प्रत्यक्ष प्रभाव पारेको अर्थविद्हरूको विश्लेषण छ ।
