काठमाडौँ । सरकारले देशभरका दूध उत्पादक किसानहरूको करिब ३ अर्ब रुपैयाँ बक्यौता रकम चालू आर्थिक वर्षको असार मसान्तभित्र उपलब्ध गराउन निर्देशन दिएको छ । लामो समयदेखि डेरी उद्योगहरूले भुक्तानी नगर्दा किसानहरू समस्यामा परेकाले यो निर्देशन दिइएको हो ।
मन्त्रालयको पहल र डेरी एसोसिएसनसँग छलफल
कृषि तथा पशुपक्षी विकास मन्त्रालयले डेरी उद्योगको छाता सङ्गठन नेपाल डेरी एसोसिएसनसँग बक्यौता भुक्तानीका विषयमा छलफल गरी अविलम्ब रकम फर्छ्यौट गर्न निर्देशन दिएको छ । निजी क्षेत्रबाट सञ्चालित विभिन्न डेरी उद्योगहरूले किसानले बिक्री गरेको दूधको भुक्तानी लामो समयदेखि नगरेकाले किसानहरू मारमा परेका थिए ।
मन्त्रालयका सूचना अधिकारी महानन्द जोशीले यो समस्याले दूध उत्पादन तथा बजार आपूर्ति प्रभावित हुन सक्ने भएकाले असार मसान्तसम्म भुक्तानी गर्नुपर्ने बताएका छन् ।
दुग्ध विकास संस्थानको भुक्तानी र किसानका माग
दुग्ध विकास संस्थान ले गत पुस मसान्तसम्मको किसानको बक्यौताबापत रहेको करिब ९० करोड रुपैयाँ उपलब्ध गराइसकेको छ भने बाँकी रकम भुक्तानीको प्रक्रिया सुरु गरेको सूचना अधिकारी जोशीले जानकारी दिए।
सरकारले दैनिक गुणस्तरीय दूध सेवनका लागि जनचेतना जगाउने र पोषणयुक्त दूध तथा दुग्ध पदार्थको उपभोगमा वृद्धि गर्न विभिन्न प्रदेशमा कार्यक्रम सञ्चालन गरेको डेरी एसोसिएसनलाई विभिन्न सहुलियत तथा प्राविधिक र रचनात्मक सहयोग उपलब्ध गराउँदै आएको छ।
नेपाल किसान महासङ्घका अध्यक्ष गणेशप्रसाद तिमिल्सिनाले किसानले उत्पादन गरेको दूधबाट नाफा कमाउने डेरी उद्योगले किसानलाई तिर्नुपर्ने रकम असुली गर्न सरकारले कडाइ गर्नुपर्ने बताएका छन्। विभिन्न किसान सङ्घसंस्थाहरूले पनि दूध किसानको रकम समयमै उपलब्ध गराउन माग गर्दै आएका थिए।
यस सरकारी निर्देशनले किसानको लामो समयदेखिको समस्या समाधान हुने र दूध उत्पादनमा सकारात्मक प्रभाव पर्ने अपेक्षा गरिएको छ।
