काठमाडौँ । नेपालको राष्ट्रिय ध्वजावाहक नेपाल वायुसेवा निगमले आज आफ्नो ६७औँ वार्षिकोत्सव मनाउँदैछ, तर यो उत्सव करिब ५० अर्ब रुपैयाँको विशाल ऋण दायित्वले छायामा परेको छ ।
सन् १९५८ जुलाई १ मा २८ सिट क्षमताको डोग्लस डीसी ३ डाकोटाबाट सेवा सुरु गरेको निगमले वाइडबडी ए ३३०-२०० सिरिजका विमानसमेत सञ्चालनमा ल्याइसकेको छ।
अन्तर्राष्ट्रिय र आन्तरिक उडानको अवस्था
निगमले हाल दुईवटा वाइडबडी ए ३३० र दुईवटा न्यारोबडी ए ३२० सिरिजका विमानमार्फत अन्तर्राष्ट्रिय उडान भर्दै आएको छ। यसका अन्तर्राष्ट्रिय गन्तव्यहरूमा नयाँदिल्ली, बेङ्लोर, मुम्बई (भारत), हङकङ, मलेसिया, थाइल्याण्ड, जापानको नारिता, कतारको दोहा, युनाइटेड अरब इमिरेट्सको दुबई र साउदी अरबको रियाद रहेका छन्।
आन्तरिकतर्फ भने निगमसँग दुईवटा ट्वीनअटर विमान मात्र छन्, जसका कारण दुर्गम भेगका विमानस्थलमा मात्र सीमित सेवा प्रदान गर्न सकेको छ। विमानको अभावले आन्तरिक बजारमा निगमको उपस्थिति कमजोर बनेको छ।
वित्तीय चुनौती र सुधारका प्रयास
निगमको सबैभन्दा ठूलो चुनौती यसको ऋण दायित्व हो, जुन वाइडबडी विमान खरिदका लागि कर्मचारी सञ्चयकोष र नागरिक लगानी कोषबाट लिइएको ऋणका कारण करिब ५० अर्ब रुपैयाँ पुगेको छ। व्यवस्थापकीय कमजोरी, विमानको पूर्ण सञ्चालन हुन नसक्नु र बजेट एयरलाइन्ससँगको प्रतिस्पर्धाले विगतमा निगमको साख खस्केको थियो।
यद्यपि, हाल उत्कृष्ट ग्राउण्ड ह्याण्डलिङ सेवा र अन्तर्राष्ट्रिय गन्तव्यमा व्यापार प्रवर्द्धनले निगमको साखमा केही सुधार आएको प्रवक्ता सुवास डाँगीले बताएका छन्। उनका अनुसार अन्तर्राष्ट्रिय गन्तव्यमा रहेका चारवटै विमान पूर्ण क्षमतामा सञ्चालन भइरहेका छन्। आन्तरिक बजारमा विमान संख्या कम भएकाले सबै गन्तव्यमा सेवा विस्तार गर्न नसकिएको र थप नयाँ अन्तर्राष्ट्रिय गन्तव्यमा उडान सेवा विस्तारका लागि पहल भइरहेको उनले जानकारी दिए।
निगमको सुधारका लागि पटक-पटक अध्ययन समिति बने पनि तिनका प्रतिवेदन कार्यान्वयनमा आउन सकेका छैनन्। तालुकदार मन्त्रालयले विभिन्न योजना सार्वजनिक गरे पनि त्यसको व्यावहारिक कार्यान्वयन हुन सकेको छैन।
वार्षिकोत्सव समारोह
६७औँ वार्षिकोत्सवको अवसरमा निगमले मैत्रीपूर्ण फुटबल प्रतियोगिता, खुला कविता वाचन प्रतियोगिता र टेबल टेनिस प्रतियोगिता आयोजना गरेको थियो ।
वार्षिकोत्सव मूल समारोह समितिअन्तर्गत खेलकुद उपसमितिले सातदोबाटोस्थित एन्फा खेल मैदानमा आयोजना गरेको फुटबल प्रतियोगितामा पुरुष कर्मचारी, महिला कर्मचारी र कार्यकारी समूहका कर्मचारीहरूबीच छुट्टाछुट्टै खेल भएका थिए ।
संस्कृति, पर्यटन तथा नागरिक उड्डयनमन्त्रीको उपस्थितिमा सम्पन्न यी कार्यक्रमले निगममा केही उत्साह थपेको छ।
आज बिहान केन्द्रीय कार्यालय परिसरमा प्रभातफेरी कार्यक्रमसमेत आयोजना गरिने निगमले जनाएको छ ।
