इनरुवा (सुनसरी) । सशस्त्र प्रहरीको गोली प्रहारबाट स्थानीय विजय साहको मृत्यु भएपछि बिहानैदेखि तनावग्रस्त बनेको सुनसरीको लौकही क्षेत्र सर्वपक्षीय सहमतिपछि साम्य भएको छ। जिल्ला प्रशासन कार्यालय सुनसरीमा प्रमुख जिल्ला अधिकारी वासुदेव घिमिरेको अध्यक्षतामा बसेको बैठकले विभिन्न बुँदामा सहमति गरेसँगै अवस्था सामान्य बनेको हो।
बैठकमा भएका मुख्य सहमतिहरू:
छानबिन र कारबाही: घटनाको निष्पक्ष छानबिन गरी दोषीउपर कडा कानुनी कारबाही गर्ने।
क्षतिपूर्ति: काजकिरिया खर्चबापत पीडित परिवारलाई सशस्त्र प्रहरीले तत्काल १ लाख रुपैयाँ उपलब्ध गराउने।
रोजगारी: मृतकको परिवारका सदस्यले इच्छा राखेमा सशस्त्र प्रहरीमा जागिरका लागि प्रक्रिया अगाडि बढाउन सहयोग गर्ने।
टोली परिवर्तन: लौकहीमा खटिएको साविकको सशस्त्र प्रहरीको टोलीलाई फिर्ता बोलाएर नयाँ टोली पठाउने।
शव परीक्षणका लागि धरान पठाइयो सहमतिपश्चात् मृतकका आफन्त र स्थानीयले आन्दोलनका कार्यक्रम फिर्ता लिएका छन्। पीडित पक्षले शव बुझेर पोस्टमार्टमका लागि धरानस्थित बीपी कोइराला स्वास्थ्य विज्ञान प्रतिष्ठान पठाएको जिल्ला प्रहरी कार्यालयका प्रहरी नायब उपरीक्षक (DSP) चन्द्रबहादुर खड्काले जानकारी दिए।
तनावको पृष्ठभूमि सशस्त्र प्रहरीको गोली लागेर साहको मृत्यु भएपछि आक्रोशित स्थानीयले बिहीबार बिहानैदेखि लौकही बजारमा प्रदर्शन गरेका थिए। प्रदर्शनकारीले लौकहीस्थित सशस्त्र प्रहरीको पोस्टमा तोडफोड गर्नुका साथै आगजनी गरेपछि स्थिति नियन्त्रण बाहिर गएको थियो। प्रशासनको पछिल्लो पहलसँगै जनजीवन सामान्य बन्दै गएको छ।
