काठमाडौँ । सिटिजन्स बैंक इन्टरनेसनल लिमिटेडले ग्राहकहरूलाई अझ सहज र आधुनिक बैंकिङ सेवा प्रदान गर्ने उद्देश्यले मुद्दती निक्षेप (Fixed Deposit) धितोमा अनलाइन माध्यमबाटै कर्जा लिन सकिने ‘डिजिटल लोन अगेन्स्ट फिक्स्ड डिपोजिट’ सुविधा सञ्चालनमा ल्याएको छ।
यो सुविधाअन्तर्गत ग्राहकहरूले आफ्नो मुद्दती निक्षेपको ९० प्रतिशतसम्म वा अधिकतम २ लाख रुपैयाँ (कम्तीमा ५ हजार रुपैयाँ) सम्मको ऋण मोबाइल बैंकिङ एपमार्फत तत्काल प्राप्त गर्न सक्नेछन्। यसका लागि कुनै पनि भौतिक कागजात पेस गर्नु पर्दैन र कर्जा रकम सोझै आवेदकको बचत खातामा जम्मा हुनेछ।
सिटिजन्स बैंकले डिजिटल प्रविधिको उपयोग गर्दै ग्राहकहरूको समय र श्रम बचत गर्न यो नयाँ सेवा ल्याएको जनाएको छ।
बैंकका अन्य डिजिटल पहलहरू
हालसालै ‘बैंक अफ द इयर २०२४’ को उपाधि प्राप्त गर्न सफल सिटिजन्स बैंकले यसअघि पनि विभिन्न डिजिटल सेवाहरू सुरु गरिसकेको छ। केही समयअघि मात्र फोनपेसँगको सहकार्यमा नेपालमै पहिलो पटक ‘सिटिजन्स फोनपे क्रेडिट कार्ड’ (भर्चुअल क्रेडिट कार्ड) सञ्चालनमा ल्याएको थियो।
यसबाहेक, बैंकले मोबाइल बैंकिङ एपमार्फत नै शेयर आवेदन (ASBA) र CRN नम्बर सेवा तथा क्रस बैंक टेलर सुविधा पनि प्रदान गर्दै आएको छ। क्रस बैंक टेलर सुविधाअन्तर्गत अन्य बैंकका ग्राहकले पनि सिटिजन्स बैंकको शाखामा टेलर क्यूआर स्क्यान गरी नगद निकाल्न सक्नेछन्।
सिटिजन्स बैंक इन्टरनेसनल लिमिटेडले देशभरका ६१ जिल्लामा फैलिएका २०० शाखा, १६८ एटीएम, ३ विस्तारित काउन्टर र ७४ शाखा रहित बैंकिङ इकाइहरू मार्फत १९ लाख ७ हजारभन्दा बढी ग्राहकहरूलाई आधुनिक बैंकिङ सेवाहरू प्रदान गर्दै आएको छ।
