काठमाडौँ । सोपान फर्मास्युटिकल्स लिमिटेडले आगामी वैशाख २ गतेदेखि सर्वसाधारणका लागि प्राथमिक सेयर (IPO) निष्कासन गर्ने भएको छ । वैदेशिक रोजगारीमा रहेका नेपालीहरूका लागि सेयर बाँडफाँड गरिसकेपछि कम्पनीले दोस्रो चरणमा सर्वसाधारणका लागि बिक्री खुला गर्न लागेको हो ।
नेपाल धितोपत्र बोर्डबाट फागुन १७ गते प्रतिकित्ता १०० रुपैयाँ अंकित मूल्यमा कुल ४२ लाख ९० हजार कित्ता सेयर निष्कासनको अनुमति पाएको यस कम्पनीले विभिन्न समूहका लागि कोटा निर्धारण गरेको छ।
सेयर संरचना र बाँडफाँड विवरण:
कम्पनीले कुल निष्कासनमध्ये विभिन्न क्षेत्रका लागि यसरी सेयर छुट्याएको छ:
वैदेशिक रोजगारीमा रहेका नेपाली: ४ लाख २९ हजार कित्ता (बाँडफाँड भइसकेको)
सामूहिक लगानी कोष: २ लाख १४ हजार ५०० कित्ता (५ प्रतिशत)
कर्मचारीका लागि सुरक्षित: १ लाख ७१ हजार ६०० कित्ता (४ प्रतिशत)
सर्वसाधारणका लागि बाँकी: ३४ लाख ७४ हजार ९०० कित्ता
लगानीकर्ताले जान्नुपर्ने मुख्य कुराहरू:
आवेदन मिति: वैशाख २ गतेदेखि छिटोमा वैशाख ६ गतेसम्म आवेदन दिन सकिनेछ ।
न्यूनतम र अधिकतम कित्ता: लगानीकर्ताले न्यूनतम १० कित्ता र अधिकतम ११,००० कित्तासम्मका लागि आवेदन दिन सक्नेछन् ।
बिक्री प्रबन्धक: कम्पनीको धितोपत्र निष्कासन तथा बिक्री प्रबन्धकमा एनएमबि क्यापिटल लिमिटेड रहेको छ ।
लगानीकर्ताले नेपाल धितोपत्र बोर्डबाट स्वीकृती प्राप्त गरेका सम्पूर्ण आस्बा सदस्य बैंक तथा वित्तीय संस्था र तिनका तोकिएका शाखा कार्यालयहरु तथा सिडिएस एण्ड क्लियरिङ्ग लिमिटेडबाट निर्माण गरिएको सफ्टवेयर ‘मेरो शेयर’ अनलाईन प्रयोग गरी सि–आस्बा प्रणाली मार्फत आवेदन दिन सक्नेछन्।
आईपीओ निष्काशनको लागि गराएको रेटिङ्गमा केयर रेटिङ्ग नेपालले कम्पनीलाई केयरएनपी सिंगल बी इस्यूअर रेटिङ्ग प्रदान गरेको छ। यसले कम्पनीको दायित्व बहन गर्ने क्षमतामा उच्च जोखिम रहेको संकेत गर्दछ।
कम्पनीको साधारण लगानी फिर्ता हुने अवधि ८.११ वर्ष रहेको छ भने डिस्काउण्ट लगानी फिर्ता हुने अवधि ११.३५ वर्ष रहेको छ। कम्पनीको खुद वर्तमान मूल्य १५ अर्ब ९७ करोड ५९ लाख ३९ हजार २५७ रुपैयाँ रहेको छ भने आन्तरिक प्रतिफल दर २३.६३ प्रतिशत रहेको छ।
यो आईपीओको सूचीकरण पश्चात सोपान फर्मास्युटिकल्स नेपाल स्टक एक्सचेन्ज (नेप्से) मा सूचीकृत हुने दोस्रो औषधि उत्पादक कम्पनी बन्नेछ ।
