काठमाडौँ । साताको पहिलो कारोबार दिन आइतबार धितोपत्र बजार मापक सूचक (नेप्से) मा उच्च अंकको सुधार देखिएको छ। अघिल्लो कारोबार दिन सामान्य बढेको बजारमा आज २ प्रतिशतभन्दा बढीको वृद्धि देखिएको हो।
सूचक र कारोबार विवरण:
आइतबार नेप्से परिसूचक ५७.५५ अंकले बढेर २७७२.१७ विन्दुमा पुगेको छ। नेप्सेसँगै कारोबार रकममा पनि उल्लेख्य सुधार आएको छ। ३३१ कम्पनीको ३ करोड ९ लाख १५ हजार कित्ता शेयर १ लाख ३३ हजार पटक खरिदबिक्री हुँदा १३ अर्ब ७८ करोड ५७ लाख रुपैयाँ बराबरको कारोबार भएको छ। गत बिहीबार ९ अर्ब ७ करोडको कारोबार भएको थियो।
सर्किट लागेका कम्पनीहरू:
आज बजारमा उत्साह छाउँदा ९ वटा कम्पनीको शेयर मूल्यमा सकारात्मक सर्किट (१० प्रतिशत वृद्धि) लागेको छ। सर्किट लाग्ने कम्पनीहरूमा:
एसवाई प्यानल, श्रीनगर एग्रीटेक, नेपाल माइक्रो इन्स्योरेन्स, बन्दीपुर केबलकार, हिमस्टार उर्जा, माबिलुङ्ग इनर्जी, रिलायन्स फाइनान्स, आँखु खोला जलविद्युत र त्रिशुली जलविद्युत कम्पनी रहेका छन्।
यस्तै, क्रेष्ट माइक्रो लाइफ इन्स्योरेन्स र नेपाल वेयरहाउजिङ्गको शेयर मूल्य पनि करिब १० प्रतिशतले बढेको छ।
उपसमूह र अग्रस्थान:
आज १३ वटै उपसमूहको परिसूचकमा हरियाली छाएको छ। होटल तथा पर्यटन उपसमूह सबैभन्दा बढी ३.३५ प्रतिशतले बढ्यो भने जलविद्युत, लगानी, जीवन बीमा र उत्पादनमूलक क्षेत्रमा २ प्रतिशतभन्दा बढीको सुधार देखियो।
सर्वाधिक कारोबार
कारोबार रकमका आधारमा आँखु खोला जलविद्युत कम्पनी ४३ करोड ५९ लाख रुपैयाँसहित शीर्ष स्थानमा रह्यो। यस्तै, ग्रीन भेन्चर्सको ३९ करोड ५० लाख र शिवम् सिमेन्ट्सको ३२ करोड रुपैयाँभन्दा बढीको शेयर किनबेच भयो।
