काठमाडौँ । कालिका पावर कम्पनी लिमिटेडले गत आर्थिक वर्षको मुनाफाबाट लाभांश वितरण तथा अन्य महत्त्वपूर्ण प्रस्तावहरू पारित गर्न १८औँ वार्षिक साधारण सभा आह्वान गरेको छ ।
कम्पनीको सञ्चालक समितिको बैठकले आगामी पुस २८ गते, सोमबार चितवनको भरतपुरस्थित दियालो फुडल्याण्डमा सभा गर्ने निर्णय गरेको हो ।
बिहान ११ बजे सुरु हुने सो सभाले शेयरधनीहरूका लागि घोषणा गरिएको लाभांशलाई अन्तिम स्वीकृति दिनेछ ।
मुख्य एजेन्डाहरू:-
लाभांश पारित:
हाल कायम चुक्ता पूँजीको ७ प्रतिशत बोनस शेयर र कर प्रयोजनका लागि ०.३६८४ प्रतिशत नगद लाभांश वितरण गर्ने विशेष प्रस्ताव पारित गर्ने।
होल्डिङ कम्पनीको अवधारणा:
अन्य कम्पनीहरूमा लगानी सहज बनाउन कम्पनीलाई ‘होल्डिङ कम्पनी’ को रूपमा विकास गर्ने र सोही अनुसार प्रबन्धपत्र तथा नियमावली संशोधन गर्न सञ्चालक समितिलाई अख्तियारी दिने।
विविध:
लेखापरीक्षक नियुक्त गर्ने र अन्य नियमित वित्तीय प्रतिवेदनहरू अनुमोदन गर्ने।
बुकक्लोज र शेयरधनी योग्यता:
साधारण सभा र लाभांश प्रयोजनका लागि कम्पनीले पुस १८ गते बुकक्लोज गर्ने भएको छ । तसर्थ, पुस १७ गतेसम्म नेपाल स्टक एक्सचेञ्ज (नेप्से) मा कारोबार भई कायम रहेका शेयरधनीहरू मात्र लाभांश प्राप्त गर्न र साधारण सभामा सहभागी हुन योग्य हुनेछन् ।
