काठमाडौँ । नेपाल धितोपत्र बोर्ड (सेबोन) का अध्यक्ष सन्तोषनारायण श्रेष्ठमाथि भ्रष्टाचारको आरोप लगाउँदै हिरासतमा रहेका सेयर लगानीकर्ता दीपेन्द्र अग्रवालले अनिश्चितकालीन भोकहड्ताल सुरु गरेका छन् ।
आईपीओ निष्कासन र विभिन्न कम्पनीहरूको फाइल अगाडि बढाउने क्रममा अध्यक्ष श्रेष्ठले करोडौँ रुपैयाँ घुस लिएको दाबी गर्दै अग्रवालले निष्पक्ष छानबिनको माग गरेका हुन् ।
अग्रवालको माग र अनसन नेपाल प्रहरीको केन्द्रीय अनुसन्धान ब्युरो (सीआईबी) को नियन्त्रणमा रहेका अग्रवालले शुक्रबारदेखि नै अन्न ग्रहण नगरेको उनकी पत्नीले जानकारी दिएकी छिन्। सोमबार एक घोषणा गर्दै अग्रवालले धितोपत्र बोर्डले लुकाएर राखेका भित्री कारोबार (इन्साइडर ट्रेडिङ) सँग सम्बन्धित सबै फाइलहरू खोल्नुपर्ने र दोषीलाई कानुनी दायरामा ल्याउनुपर्ने सर्त राखेका छन् । आफूलाई पूर्वाग्रही ढङ्गले पक्राउ गरिएको भन्दै उनले अध्यक्ष श्रेष्ठमाथि कारबाही नभएसम्म पानी समेत नपिउने बताएका छन् ।
अध्यक्ष श्रेष्ठमाथि लागेका गम्भीर आरोपहरू समाचारका अनुसार अध्यक्ष श्रेष्ठमाथि विभिन्न प्रकरणमा करोडौँको आर्थिक लेनदेनको आरोप लागेको छ:-
रिलायन्स स्पिनिङ मिल्स:
यस कम्पनीको आईपीओ प्रक्रिया अघि बढाएबापत साढे ९ करोड रुपैयाँ घुस बुझेको दाबीसहित अख्तियार र अर्थ मन्त्रालयमा उजुरी परेको छ ।
एनआरएन इन्फ्रास्ट्रक्चर:
इन्साइडर ट्रेडिङको अनुसन्धान निस्तेज पार्ने सर्तमा भतिजामार्फत ७ करोड रुपैयाँ बुझेको आरोप सेबोनकै कर्मचारीले लगाएका छन्।
इप्पानको दाबी:
स्वतन्त्र ऊर्जा उत्पादकहरूको संस्था (इप्पान) ले अध्यक्ष श्रेष्ठले बिचौलिया प्रयोग गरी आईपीओ स्वीकृतिका लागि ७ प्रतिशतसम्म कमिसन मागेको सार्वजनिक आरोप लगाएको थियो।
पक्राउको पृष्ठभूमि र बार्गेनिङको चर्चा जोशी हाइड्रोपावर र कर्पोरेट डेभलपमेन्ट बैंकको सेयरमा भित्री कारोबार गरेको भन्दै सेबोनले दिएको प्रतिवेदनका आधारमा सीआईबीले अग्रवाललाई चुनदेवीबाट पक्राउ गरेको थियो । यद्यपि, अग्रवाल पक्षले भने सीआईबीलाई फाइल पठाउनुअघि अध्यक्ष श्रेष्ठले आफूसँग ‘बार्गेनिङ’ गरेको र कुरा नमिलेपछि पूर्वाग्रह राखेर पक्राउ गराएको आरोप लगाएका छन् ।
पछिल्लो समय सेयर बजारका ठुला खेलाडी र नियामक निकायको नेतृत्वबीचको यो द्वन्द्वले धितोपत्र बजारमा तरंग पैदा गरेको छ ।
