काठमाडौँ । साताको अन्तिम कारोबार दिन बिहीबार नेप्से परिसूचक घटेर बन्द भएको छ। अघिल्ला दुई कारोबार दिनदेखि ओरालो लागिरहेको नेप्सेले यस दिन पनि सोही क्रमलाई निरन्तरता दिएको हो।
आज नेप्से परिसूचक २४.७६ अंक घटेर २६२८.९१ विन्दुमा झरेको छ। यस्तै, सेन्सेटिभ इण्डेक्स ३.०१ अंक, फ्लोट इण्डेक्स १.४४ अंक र सेन्सेटिभ फ्लोट इण्डेक्स १.०१ अंक घटेको छ।
कारोबार रकममा वृद्धि:
नेप्से घटे पनि यस दिन कारोबार रकममा भने वृद्धि भएको छ। अघिल्लो कारोबार दिन बुधबार ९ अर्ब रुपैयाँ बराबरको शेयर खरिदबिक्री भएकोमा, आज ३१४ स्टकको १ लाख २१ हजार ५५१ पटकको कारोबारमा ११ अर्ब २३ करोड १४ लाख ८९ हजार रुपैयाँ बराबरको २ करोड ९४ लाख १५ हजार कित्ता शेयर खरिदबिक्री भएको छ।
सर्वाधिक वृद्धि र गिरावट:
यस दिन पञ्चकन्या माइ हाइड्रोपावरको शेयरमूल्य सर्वाधिक ९.९८ प्रतिशत बढेको छ। विगत १२ कारोबार दिनदेखि सकारात्मक सर्किट लेभलमा कारोबार भएको पियोर इनर्जीको शेयर आज भने नकारात्मक सर्किट लेभलमा कारोबार भएको छ। सो कम्पनीको शेयरमूल्य यस दिन १२० रुपैयाँ ६८ पैसा घटेर १ हजार ८६ रुपैयाँ ५२ पैसामा अन्तिम कारोबार भएको छ। त्यस्तै, रसुवागढी हाइड्रोपावर कम्पनी र भुगोल इनर्जी डेभलपमेन्ट कम्पनीको शेयर पनि नकारात्मक सर्किट लेभलमा कारोबार भएको छ।
कारोबार रकममा अग्रस्थान:
कारोबार रकमका आधारमा यस दिन ङादी ग्रुप पावर शीर्ष स्थानमा रहेको छ। सो कम्पनीको आज ८५ करोड ४४ लाख ५६ हजार रुपैयाँ बराबरको शेयर कारोबार भएको छ। यस्तै, बुटवल पावर कम्पनीको ५८ करोड रुपैयाँभन्दा बढीको शेयर खरिदबिक्री भएको छ भने सिंगटी हाइड्रो इनर्जीको करिब ४८ करोड रुपैयाँको शेयर किनबेच भएको छ।
उपसमूहमा गिरावट:
आज १३ वटै उपसमूहको परिसूचक घटेका छन्। जसमध्ये व्यापार उपसमूहको परिसूचक सर्वाधिक २.४७ प्रतिशत घटेको छ। विकास बैंक, जलविद्युत, उत्पादन तथा प्रशोधन, लघुवित्त र अन्य उपसमूहको परिसूचक १ प्रतिशतभन्दा बढीले घटेका छन्।
