लक्ष्मी सनराइज बैंक २७ करोड घाटामा, प्रतिसेयर आम्दानी पनि ऋणात्मक

काठमाडौँ । लक्ष्मी सनराइज बैंक लिमिटेडले चालु आर्थिक वर्षको दोस्रो त्रैमास (पुस मसान्त) सम्मको अपरिष्कृत वित्तीय विवरण सार्वजनिक गरेको छ । विवरणअनुसार बैंकको वित्तीय अवस्थामा निकै दबाब देखिएको छ। गत वर्ष १ अर्बभन्दा बढी नाफामा रहेको बैंक यो वर्ष २७ करोड ३६ लाख रुपैयाँ खुद घाटामा पुगेको छ ।

अघिल्लो आर्थिक वर्षको सोही अवधिमा बैंकले १ अर्ब १६ करोड २० लाख रुपैयाँ खुद नाफा आर्जन गरेको थियो ।

ब्याज र कमिसन आम्दानी बढ्दा पनि सञ्चालन घाटा

बैंकको मुख्य व्यावसायिक आम्दानीमा भने वृद्धि देखिएको छ । खुद ब्याज आम्दानी १.१४ प्रतिशतले बढेर ५ अर्ब २४ करोड ९० लाख रुपैयाँ पुगेको छ भने खुद फि तथा कमिसन आम्दानी १८.१५ प्रतिशतले बढेर १ अर्ब १८ करोड पुगेको छ ।

व्यावसायिक आम्दानी बढे पनि बैंक १५ करोड ९८ लाख रुपैयाँ सञ्चालन घाटामा रहेको छ । गत वर्ष यही अवधिमा बैंक १ अर्ब ७९ करोड ३० लाख रुपैयाँ सञ्चालन मुनाफामा थियो ।

प्रमुख वित्तीय सूचकहरूको अवस्था:

खराब कर्जा र वितरणयोग्य मुनाफा

बैंकको खराब कर्जा (NPL) ५.६७ प्रतिशतबाट सामान्य घटेर ५.५० प्रतिशतमा झरेको भए पनि यो अझै उच्च छ। नाफा ऋणात्मक भएसँगै बैंकको वितरणयोग्य मुनाफा ८४ करोड २७ लाख रुपैयाँ ऋणात्मक देखिएको छ, जसको अर्थ बैंक अहिले लाभांश बाँड्न सक्ने अवस्थामा छैन। बैंकको प्रतिसेयर आम्दानी पनि २ रुपैयाँ ०४ पैसा नोक्सानमा छ।

पुँजी र निक्षेपको अवस्था

चुक्ता पुँजी २६ अर्ब ७८ करोड ११ लाख रुपैयाँ भएको बैंकको जगेडा कोषमा १८ अर्ब ५८ करोड रुपैयाँ सञ्चित छ। बैंकले पुस मसान्तसम्म ३ खर्ब ८४ अर्ब २३ करोड निक्षेप संकलन गरी २ खर्ब ८७ अर्ब ९० करोड रुपैयाँ कर्जा प्रवाह गरेको छ। हाल बैंकको प्रतिसेयर नेटवर्थ १६६ रुपैयाँ २३ पैसा छ।