काठमाडौँ । नेपाल एसबिआई बैंक लिमिटेड (SBI) ले आगामी असार ३० गतेदेखि ‘७ प्रतिशत नेपाल एसबिआई बैंक ऋणपत्र २०९०’ निष्कासन तथा बिक्री खुला गर्ने भएको छ। यो १० वर्ष अवधिको ऋणपत्रमा वार्षिक ७ प्रतिशत ब्याजदर प्रदान गरिनेछ।
ऋणपत्रको विवरण र बाँडफाँट
बैंकले प्रतिऋणपत्र एक हजार अंकित दरका ३ अर्ब रुपैयाँ बराबरको ३० लाख कित्ता ऋणपत्र निष्कासन गर्न लागेको हो।
कुल कित्तामध्ये ६० प्रतिशत (१८ लाख कित्ता) व्यक्तिगत तवरबाट बाँडफाँट गरिनेछ।
बाँकी ४० प्रतिशत (१२ लाख कित्ता) सर्वसाधारणमा बाँडफाँट गरिनेछ।
सर्वसाधारणका लागि छुट्याइएकोमध्ये ५ प्रतिशत (६० हजार कित्ता) सामूहिक लगानी कोषहरूका लागि सुरक्षित गरिएको छ।
आवेदन प्रक्रिया र समयसीमा
लगानीकर्ताले न्यूनतम २५ कित्ताका लागि आवेदन दिनुपर्नेछ भने अधिकतममा सम्पूर्ण कित्ताका लागि आवेदन दिन सक्नेछन्।
ऋणपत्र निष्कासन छिटोमा साउन १ गते बन्द हुनेछ भने ढिलोमा साउन १२ गते सम्म आवेदन दिन सकिनेछ।
बैंकको धितोपत्र निष्कासन तथा बिक्री प्रबन्धक नबिल इन्भेष्टमेन्ट बैंकिङ्ग लिमिटेड रहेको छ। लगानीकर्ताले नेपाल धितोपत्र बोर्डबाट स्वीकृति प्राप्त आस्बा सेवामा सहभागी बैंक तथा वित्तीय संस्थाहरू र तिनका तोकिएका शाखा कार्यालयहरू तथा सिडिएस एण्ड क्लियरिङ्ग लिमिटेडबाट निर्माण गरिएको सफ्टवेयर ‘मेरो शेयर’ अनलाइन प्रयोग गरी सि आस्बा प्रणालीमार्फत आवेदन दिन सक्नेछन्।
क्रेडिट रेटिङ्ग र ब्याज भुक्तानी
ऋणपत्र निष्कासनका लागि गराइएको क्रेडिट रेटिङ्गमा इक्रा नेपालले बैंकलाई इक्राएनपी इस्यूअर रेटिङ्ग डबल ए (ICRA NP Issuer Rating Double A) प्रदान गरेको छ। यसले समयमा वित्तीय दायित्व पूरा गर्ने सम्बन्धमा बैंक उच्च सुरक्षित रहेको संकेत गर्दछ।
सो ऋणपत्रमा आर्जित ब्याज रकम प्रत्येक आर्थिक वर्षको प्रथम अर्धवार्षिक र दोस्रो अर्धवार्षिक समाप्त भएपश्चात कर कट्टा गरी भुक्तानी गरिनेछ।
