काठमाडाैँ । पछिल्लो समय बैंकिङ प्रणालीमा अधिक तरलताको अवस्था कायमै रहेको छ । बैंकमा अधिक तरलता रहँदा नेपाल राष्ट्र बैंकले तरलता प्रशोचन गरिरहेको छ । सोही अनुसार बुधबार (आज) फेरि केन्द्रीय बैंकले बजारबाट ४० अर्ब रुपैयाँ उठाउने भएको हो ।
अधिक तरलता व्यवस्थापन गर्न केन्द्रीय बैंकले निक्षेप संकलन उपकरणको प्रयोग गर्दै बैंकिङ प्रणालीबाट उक्त रकम खिच्न लागेको हो । यसका लागि आज दिउँसो ३ बजे बोलकबोल हुने राष्ट्र बैंकले जनाएको छ । २१ दिने अवधिको उक्त रकमको साँवा र ब्याज असार १८ गते भुक्तानी गरिने राष्ट्र बैंकले जनाएको छ ।
निक्षेप दिन चाहने बैंक तथा वित्तीय संस्थाले घटीमा १० करोड रुपैयाँ र बढीमा ५ करोड रुपैयाँले भाग गर्दा निःशेष भाग जाने गरी कुल आह्वान रकमसम्म बोलकबोल गर्न सक्नेछन् । निक्षेप संकलनको बोलकबोल ब्याजदरमा गर्नुपर्नेछ भने बहुब्याजदरमा पनि बहुबोलकबोल गर्न सकिने राष्ट्र बैंकले जनाएको छ । निक्षेप संकलन उपकरणको बोलकबोलमा ‘क’, ‘ख’ र ‘ग’ वर्गका बैंक तथा वित्तीय संस्थामात्र सहभागी हुन पाउनेछन् ।
