कैलालीको जानकी गाउँपालिका-९ मा ७३ लाख ५० हजारभन्दा बढी अनियमितता; मृत व्यक्ति र नक्कली औँठा छाप प्रयोग
काठमाडौँ । अख्तियार दुरुपयोग अनुसन्धान आयोगले कैलालीको जानकी गाउँपालिका–९ का वडाध्यक्ष खकेन्द्र भण्डारीसहित आठ जनाविरुद्ध भ्रष्टाचारको मुद्दा दायर गरेको छ। सामाजिक सुरक्षा भत्ता वितरणमा व्यापक अनियमितता गरेको आरोपमा आयोगले शुक्रबार विशेष अदालतमा मुद्दा दायर गरेको हो।
अनियमितताको विवरण:
वडाध्यक्ष भण्डारीसहित आठ जना मिलेर ६८३ जना लाभग्राहीका नाममा झुट्टा अभिलेख तयार पारी करिब ७३ लाख ५० हजार (साढे ७३ लाख) रुपैयाँ हिनामिना गरेको अख्तियारले जनाएको छ।
अनुसन्धानका क्रममा मृत व्यक्तिको नाममा समेत भत्ता वितरण गरिएको, एउटै नागरिकता नम्बर प्रयोग गरी दोहोरो भत्ता लिने अभिलेख बनाइएको र नवीकरण नभएका लाभग्राहीका नाममा समेत रकम निकालिएको पाइएको छ।
नक्कली औँठा छापको पुष्टि: वडा सचिव प्रेमबहादुर बुढाले ४७९ वटा र कार्यालय सहयोगी सोनम कठरियाले २०४ वटा औँठा छाप नक्कली रूपमा प्रयोग गरेको कुरा राष्ट्रिय विधिविज्ञान प्रयोगशालाको परीक्षणबाट पुष्टि भएको आयोगले जनाएको छ।
आरोपितहरू:
मुद्दा दायर गरिएका अन्य आरोपितहरूमा वडा सचिव प्रेमबहादुर बुढा, कार्यालय सहयोगी सोनम कठरिया, वडा सदस्यहरू कल्पना खड्का, सुनकोसा सार्की, बिजयबहादुर रावल, शेरबहादुर विश्वकर्मा र खरिदार पूर्ण बहादुर विष्ट रहेका छन्।
अख्तियारले उनीहरूलाई भ्रष्टाचार निवारण ऐन, २०५९ को दफा १७ बमोजिम कारबाहीको माग गरेको छ।
